رم ابره__عيّد معانا يا ريس
عيّد معانا يا ريس
رامي مهداوي
سيادة الرئيس محمود عباس حفظك الله ورعاك
بتمنى تكون بصحة جيدة والمعنويات عالية، بكتب لك من خلال زاوية اسبوعية اسمها " خرم ابره" اللي بحاول فيها دق الخزان لتسليط الضوء على قضايا مختلفة بلسان هموم المواطن الفلسطيني.
ما بدي أطول عليك يا ريس، بس خلينا أحكيلك أشياء وتحليلات حاولت اني أجمعها قدر استطاعتي من تحركاتي في هالمجتمع اللي انا عايش فيه، نقاط فيها اختلاف ونقاط فيها اتفاق، وانت أدرى بشعبك يا ريس بنختلف أكثر ما نتفق، المهم لازم اتكون طريقنا وحده.
الكل شايف ومتبع تحركاتك الدولية والجهد اللي بتحطه، والموضوع مش شي سهل مثل ما البعض بفكر، وبعرف انك بتقابل الجميع عشان ترضي الجميع، اذا رحت أول شي على نادي ريال مدريد وانت برشلوني يا ريس، رحت عند العدو قبل الصديق. وجهة نظري يا ريس الفتره الجاي ركز على شعبك، قبل ما تتسهل على الأمم المتحدة بتمنى عليك تزور محافظات الوطن وتزور بعض المخيمات والقرى، اشحن الشعب لأنه الشعب بحب يسمعك وجه لوجه، ومهم انك تسمعهم كمان.
عيّد مع شعبك يا ريس، مهم يا ريس يكون خطابك بين الناس ومع الناس قابل شرائح المجتمع المختلفة، واحكيلهم شو بتفكر ولوين رايحين، القصة مش أيلول ولا أكتوبر، القصة رؤيا وتفكير استراتيجي. بتتذكر أيام الرئيس الشهيد ياسر عرفات لما راح على كامب ديفيد، بتذكر طلعوا جميع الألوان على الشارع أصفر، أحمر، والأخضر كان قوة للرئيس مش ضعف. لازم ترجع المسيرات للشوارع ... لازم الشعب يرجع متل ما كان قبل سنين ... لازم نرجع نسمع صدى صوت الطناجر و الصحون و خزانات الميه بعد نص الليل ...
عشان الواحد يكون منصف، بعض أعضاء اللجنة التنفيذية بقابلوا الشعب وبتحركوا بين المحافظات، والمواطنين بسألوهم من تخوفاتهم، ومع هيك انت مهم اتكون بين الناس في الفتره القادمه. الشاعر الأبنودي شو حكى: يا قدس قولى لحيطانك إثبتي بقوّة ... حيخلًّصك إبنك اللى أنا مانيش هوه...لا تبحثي عن حلول.. الحل من جوّه.. الحل من جوّه.
نقطه تانيه، الشعب تعب يا ريس، والمواطن كفر في كل شي، وشوي شوي صرنا لا مبالين، صار خبزنا ولعبة لأطفالنا يعيدوا فيها أهم من أي شي، لأنه المواطن غايب عن كل شي فصار ما يعنيه ولا شي.
بعض القيادات المختلفة بتدور على مصالحها، والكل بشوف الأمور من زاويته الخاصة، بحكولك شي ولما يطلع من عندك بحكوا شي مختلف... ضيعونا، عشان هيك انت يا ريس ريس الشعب بحب انك تشوف الأمور كلها من زواياها المختلفة، انت قائد المصلحة العليا اللي لا يعلوا عليها مصلحة _ مصلحة الوطن والمواطن_، يعني كثير قضايا في الساحة الفلسطينية مهم انها تتعالج، مثلاً المجتمع مش عارف ليه تم تأجيل الانتخابات المحلية للمره الثانية؟؟ والشعب بحكي " حياتنا كلها تؤجل لوينتا؟؟" المصالحة تؤجل، الرواتب تؤجل، المجلس الأعلى للشباب يؤجل، التعديل الوزاري يؤجل، ضايع الشعب يا ريس وانت الوحيد اللي بتلمه.
كمان نقطه يا ريس، أهلنا في غزة وأهلنا في 48 وأهلنا في الشتات، بعرف الموضوع مش سهل، أصلاً مش سهل تتعامل بجميع الملفات الفلسطينية، المهم نبدأ، والله عندك شباب برتفع فيهم الراس، وجاهزين يشتغلوا وينتجوا، والكل مجمع ما بدنا نخسر حالنا، بدنا انكون فلسطيينيين أولاً وأخيراً.
بدك تتحملني، لا تسمع من بعض اللي حوليك يا ريس وانت عارفهم سواء صحفيين أو ..... المهم انك تسمع من شعبك، وشعبك مش قليل بالمره بحلل سياسة وبنقد واتعلم من تاريخه، ضخ دم جديد ضخ أفكار جديده، وأهم شي فيك انك واضح يا ريس، عشان هيك مهم تسمع من الناس الصح لأنهم بعطوك المعلومه الصح اللي انت بعدين بتقدر توازن الأمور.
فتح يا ريس، الكل براهن على فتح، ما بدي أدخل في مشاكل ثوري ولا مركزي أهم شي القاعده الفتحاويه، والقاعده تعبت، وأغلبنا اتحول لجيش منسي، وهذا الجيش جيش بحب فتح أكثر من امه، بس الجيش صف وطفى، انت القائد اللي في المعركة بدك تلملم الجراح، وتنفخ الروح مهما كلف الأمر، والكل بعرف انك بتوخد قرارات جرئية وبتتحمل المسؤوليه، والجيش المنسي بحلم في هالحظة.
في كثير حكي عندي بس بتعرف، أستاذ أكرم هنيه محدد عدد الكلمات، عشان هيك بدي أختم انه الشعب بدوا اياك تكون بينه، إنزل عيد يا ريس بين شعبك وكل معمول بلدي وشرب قهوة مع الشعب وفهمهم لوين احنا رايحيين. سامحني يا ريس وكل عام و انت والشعب جاهز ومستمر للدفاع عن وطنه.
MIDEAST/ Palestinian President Mahmoud Abbas waves good bye in the end of his visit to Qatar, Tuesday,March. 01, 2006. PPO/APOLLO IMAGES APOLLO IMAGES 2006منتصرون بإذن الله
----------------------
لقد تلقيت هذه الرسالة لأنك مشترك في مجموعات Google مجموعة "فلسطين - عام
التحرير".
لإرسال هذا إلى هذه المجموعة، قم بإرسال بريد إلكتروني إلى
palestine1@googlegroups.com
لإلغاء الاشتراك في هذه المجموعة، ابعث برسالة إلكترونية إلى
palestine1+unsubscribe@googlegroups.com
لخيارات أكثر، الرجاء زيارة المجموعة على
http://groups.google.com/group/palestine1?hl=ar
ليست هناك تعليقات:
إرسال تعليق